Sot, më 25 gusht 2026, në Zyrën për Mbrojtjen e Fëmijëve të Komunës së Pejës, u mbajt takimi i Kryesisë së Asamblesë Komunale të Fëmijëve në Pejë për mandatin 2026–2028.
Takimin e udhëhoqi Kryetarja e Asamblesë Komunale të Fëmijëve, Morena Mema. Në fillim të takimit, anëtarët e Kryesisë u përshëndetën nga Drejtoresha e Administratës, znj. Nita Panduri-Mullarama, dhe Zyrtarja për Mbrojtjen e Fëmijëve, znj. Drita Krasniqi. Ato uruan Kryesinë e re për punë të mbarë dhe shprehën gatishmërinë për bashkëpunim e mbështetje të vazhdueshme në realizimin e aktiviteteve të Asamblesë.
Gjatë takimit u diskutua për organizimin e punës së Asamblesë dhe aktivitetet e planifikuara për periudhën e ardhshme, me fokus në pjesëmarrjen aktive të fëmijëve dhe promovimin e të drejtave të tyre.
Kryesia vendosi që seanca e ardhshme e Asamblesë Komunale të Fëmijëve të mbahet më 8 shtator 2026, në ora 10:00, në Sallën e Kuvendit Komunal në Pejë.
Propozim-rendi i ditës:
- Evidentimi i prezencës dhe pjesëmarrjes së anëtarëve të Asamblesë;
- Miratimi i rendit të ditës;
- Zgjedhja e anëtarëve të komisioneve të Asamblesë;
- Organizimi i aktivitetit “Dyert e Hapura për Fëmijët” dhe takimi me Kryetarin e Komunës;
- Propozimet për shënimin e 20 Nëntorit – Ditës Botërore të Fëmijëve;
- Çështje të ngritura nga asamblistët;
- Të ndryshme.
Kryesia do të vazhdojë me përgatitjet për realizimin e aktiviteteve të parapara në Planin e Punës 2026–2028, në bashkëpunim me institucionet komunale, Zyrën për Mbrojtjen e Fëmijëve dhe Riintegrim, Ekipin për Mbrojtjen e Fëmijës dhe OJQ-në “Syri i Vizionit”.
Morena Mema
Kryetare e Asamblesë Komunale të Fëmijëve në Pejë
