Sot u mbajt takimi i pestë i rregullt për këtë vit i Këshillit Komunal për Siguri në Bashkësi (KKSB) i kryesuar nga Kryetari i Komunës së Pejës, z.Gazmend Muhaxheri.
Gjatë takimit u trajtuan çështje me rëndësi, që ndërlidhen me sigurinë në bashkësi, sfidat aktuale dhe masat për përmirësimin e sigurisë, sipas pikave të përcaktuara në rendin e ditës.
Po ashtu, u prezantua Draft-Plani i Punës së KKSB-së për vitin 2027.
Në kuadër të rendit të ditës u trajtuan këto pika:
Hapja e mbledhjes, prezantimi dhe miratimi i rendit të ditës, shqyrtimi dhe miratimi i procesverbalit të mbledhjes së kaluar, si dhe prezantimi i Draft-Planit të Punës për vitin 2027, nga Koordinatori i KKSB-së, z.Fatmir Asllani.
Kryetari i Komunës së Pejës, z.Gazmend Muhaxheri para se të fillojmë me pikat e parapara të takimit, vlerësoi se është e rëndësishme t’i referohej një ngjarjeje tejet të rëndë dhe tragjike, që ka ndodhur në Komunën e Pejës, vrasjes së Arlinda Zekajt.
Në emër të Komunës së Pejës, Kryetari Muhaxheri shprehu keqardhjen e tij të thellë për këtë ngjarje tragjike dhe i shprehu ngushëllimet më të sinqerta familjes Zekaj.
Ai sqaroi se deri më tani Komuna nuk është prononcuar publikisht lidhur me këtë rast, pasi menjëherë pas ngjarjes, Divizioni për Inspektim, në kuadër të Departamentit për Shërbime Sociale të Ministrisë për Punë, Familje dhe Vlerat e Luftës Çlirimtare, ka tërhequr të gjithë lëndën nga Qendra për Punë Sociale dhe ka filluar procesin e inspektimit.
Procesi i inspektimit është ende në zhvillim. Inspektorët kanë intervistuar të gjithë zyrtarët e shërbimeve sociale në Qendrën për Punë Sociale, si dhe kanë kërkuar dhe shqyrtuar dokumentacionin përkatës.
Kryetari Muhaxheri theksoi se është vlerësuar e nevojshme, që në këtë fazë të procedurave, të mos ketë deklarime publike nga ana e tij apo nga përfaqësuesit e Qendrës për Punë Sociale.
Zyrtarët e Qendrës për Punë Sociale kanë dorëzuar raportin përkatës në Inspektoratin e Ministrisë, ndërsa gjatë javës së ardhshme janë ftuar për të dhënë deklaratat e tyre para Komisionit Hetimor të Kuvendit të Republikës së Kosovës.
Duke pasur parasysh se bëhet fjalë për një rast të ndjeshëm, me elemente konfidenciale, si dhe faktin se procedurat institucionale dhe hetimore janë ende në zhvillim theksoi rëndësinë e kujdesit dhe maturisë në çdo deklarim publik, me qëllim të respektimit të procedurave ligjore dhe shmangies së paragjykimeve lidhur me çështjet, që janë objekt i trajtimit institucional.
Aktualisht, Komuna është në pritje të raportit zyrtar të inspektimit dhe rekomandimeve konkrete, që do të dalin nga ky proces.
Pas përfundimit të të gjitha procedurave dhe krijimit të një pasqyre të plotë institucionale lidhur me rastin, Komuna do të dalë me një deklaratë zyrtare, përmes së cilës opinioni publik do të informohet në mënyrë të përgjegjshme dhe transparente.
Ushtruesi i detyrës së Komandantit të Stacionit Policor në Pejë, kapiteni Teki Sylaj, raportoi lidhur me gjendjen e sigurisë në territorin e Komunës së Pejës, duke paraqitur të dhëna dhe informacione për situatën e përgjithshme të sigurisë, aktivitetet policore, si dhe çështjet, që ndërlidhen me ruajtjen e rendit dhe sigurisë publike.
Informimi nga Kryetarja e Këshillit të Prindërve lidhur me takimin e fundit me prindër dhe përfaqësuesit e nivelit qendror, si dhe çështjet e ngritura për funksionimin e rregullt të Këshillit të Prindërve, nga znj.Arta Kollqaku.
Raporti mbi aktivitetet e realizuara, angazhimet dhe përgjegjësitë institucionale të Zyrës për Barazi Gjinore në promovimin dhe avancimin e barazisë gjinore në nivel lokal, nga znj.Samka Drançolli.
Informimi nga përfaqësuesja e OJQ-ve lidhur me sfidat, qasjen dhe sigurinë e personave me aftësi të kufizuara, me theks të veçantë në kontributin e OJQ-ve në promovimin e sigurisë, përfshirjen në jetën e përditshme dhe mirëqenien e qytetarëve me aftësi të kufizuara, nga znj.Fitore Cena Haxhihasani.
Në fund të takimit u zhvilluan diskutime dhe pyetje nga anëtarët e KKSB-së.
