“E DREJTA JONË – ZËRI YNË!”
Me kërkesë dhe iniciativë të anëtarëve të Asamblesë Komunale të Fëmijëve në Pejë, Komuna e Pejës, përmes Zyrës për Mbrojtjen e Fëmijëve, në bashkëpunim me Asamblenë Komunale të Fëmijëve, organizoi aktivitetin me rastin e shënimit të 20 Nëntorit – Ditës Botërore të të Drejtave të Fëmijës.
Aktiviteti kishte për qëllim promovimin dhe mbrojtjen e të drejtave të fëmijëve, fuqizimin e zërit të tyre, si dhe krijimin e mundësive për pjesëmarrje aktive në diskutime dhe procese vendimmarrëse lidhur me çështjet, që ndikojnë në jetën e tyre.
Në aktivitet morën pjesë përfaqësues të institucioneve komunale, drejtorë të shkollave, psikologë shkollorë, përfaqësues të Këshillave të Nxënësve, Këshillit të Prindërve, si dhe të organizatave partnere.
Panelistë në këtë aktivitet ishin: Nënkryetari i Komunës së Pejës, z.Fatmir Asllani, Drejtori i Arsimit, z.Naser Gega, zyrtarja për Mbrojtjen e Fëmijëve dhe Riintegrim, znj.Drita Krasniqi, përfaqësuesja e OJQ-së “Syri i Vizionit”, znj.Teuta Çavderbasha-Uka, Kryesuesja e Asamblesë Komunale të Fëmijëve në Pejë, znj.Morena Mema, Kryetarja e Këshillit të Prindërve në Komunën e Pejës, znj.Arta Kollqaku-Gashi, si dhe përfaqësuesja e Save the Children, znj.Lirika Begolli-Aligjiku.
Gjatë fjalëve të rastit, panelistët përcollën mesazhe dhe ndanë qëndrimet e tyre nga fushat përkatëse të përgjegjësisë, duke trajtuar rëndësinë e përkrahjes institucionale, arsimit cilësor, mbrojtjes së fëmijëve nga dhuna dhe diskriminimi, mirëqenies së tyre, rolit të familjes dhe shkollës, si dhe pjesëmarrjes aktive të fëmijëve në proceset vendimmarrëse.
Një rëndësi të veçantë pati tryeza e diskutimit, e zhvilluar nën moton “E DREJTA JONË – ZËRI YNË!”, gjatë së cilës u diskutua për çështje, që ndërlidhen me të drejtat e fëmijëve dhe rëndësinë e përfshirjes së tyre në proceset vendimmarrëse.
Në kuadër të këtij aktiviteti, anëtarët e Asamblesë Komunale të Fëmijëve realizuan edhe një parakalim nga objekti i Kuvendit Komunal drejt sheshit të qytetit, ku shpërndanë për qytetarët kopje të Konventës për të Drejtat e Fëmijës, me qëllim të sensibilizimit dhe informimit të tyre për të drejtat themelore të fëmijëve.
Përmes këtij aktiviteti u përcoll mesazhi se zëri i fëmijëve duhet të dëgjohet, të drejtat e tyre të respektohen dhe ata të jenë pjesëmarrës aktivë në vendimet, që ndikojnë në të ardhmen e tyre.


