Me rastin e 8 Marsit – Ditës Ndërkombëtare të Gruas, në sheshin “Skënderbeu” në Pejë u organizua një aktivitet sensibilizues dhe festiv me qëllim të promovimit të barazisë gjinore dhe vlerësimit të rolit dhe kontributit të grave në shoqëri.
Aktiviteti u organizua nga Zyra për Barazi Gjinore në Komunën e Pejës, e udhëhequr nga znj.Samka Drançolli për të shënuar këtë ditë të rëndësishme dhe për të përcjellë mesazhe të fuqishme për barazi, respekt dhe përfshirje.
Në kuadër të aktivitetit u organizua një panair librash nga libraria “Dukagjini”, ku u prezantuan libra të dedikuar për gruan, fuqizimin dhe rolin e saj në shoqëri.
Gjithashtu, znj.Have Shabanaj dhuroi libra falas për qytetarët kalimtarë, duke promovuar leximin dhe dijen në komunitet.
Në panair u prezantuan edhe produkte artizanale nga OJQ “Qendra për Mirëqenien e Gruas”, e cila funksionon edhe si strehimore për gratë viktima të dhunës, ku prezantoi punime të realizuara nga gratë e strehuara në këtë qendër, ndërsa OJQ “Jeta e Pavarur” prezantoi produkte të punuara nga persona me aftësi të kufizuara, duke promovuar përfshirjen dhe talentin e tyre në komunitet.
Atmosfera festive u pasurua me performancë muzikore nga nxënësit e Shkollës së Mesme të Muzikës “Halit Kasapolli”.
Parashkollori “Mollëkuqja” kontribuoi me një kënd kreativ pikturimi, ku fëmijët realizuan vizatime dhe kartolina me mesazhe urimi për 8 Marsin, të cilat ua dhuruan grave kalimtare në shesh, duke sjellë gëzim dhe emocione të veçanta.
Gjatë aktivitetit, znj.Samka Drançolli shpërndau karanfila dhe fletushka me mesazhe për barazinë gjinore dhe fuqizimin e grave, si një simbol respekti dhe vlerësimi për rolin dhe kontributin e grave në shoqëri.
Ndërkohë, pranë pikës “I Love Peja” u organizua edhe një sesion Yoga nga “Zana’s Yogalate”, në mënyrë humanitare, duke krijuar një moment relaksi dhe mirëqenieje për pjesëmarrëset.
Përmes këtij aktiviteti, Zyra për Barazi Gjinore në Komunën e Pejës ritheksoi përkushtimin për të promovuar barazinë gjinore, përfshirjen sociale dhe mbështetjen për gratë dhe vajzat në komunitet.
