Për herë të parë në Kosovë po mbahet Kongresi Botëror i Poetëve, një ndër ngjarjet më të rëndësishme ndërkombëtare kushtuar letërsisë, artit dhe kulturës. Kongresi i 45-të organizohet nga Akademia Botërore e Arteve dhe Kulturës, nën mbikëqyrjen e UNESCO-s, dhe po zhvillohet nga 25 deri më 30 shtator në qytete të ndryshme të Kosovës.
Më 27 shtator, shkrimtarë, akademikë dhe intelektualë nga 36 shtete pjesëmarrëse vizituan qytetin e Pejës. Delegacioni ndërkombëtar u prit nga kryetari i Komunës së Pejës, Gazmend Muhaxheri, kryesuesi i Kuvendit Komunal, Rexhep Kurtbogaj, dhe drejtoresha për Kulturë, Rini dhe Sport, Xhenet Syka.
Pas fjalëve të mirëseardhjes nga drejtuesit komunalë, të pranishmëve iu drejtua nobelisti Ernesto Kahan, zëvendëspresident i parë i Akademisë Botërore të Arteve dhe Kulturës. Në kuadër të ceremonisë, Gazmend Muhaxheri dhe Rexhep Kurtbogaj u nderuan me titullin “Personalitet Emeritus”, ndërsa Xhenet Syka mori Medaljen Presidenciale të Kongresit Botëror të Poetëve.
Për rëndësinë e kësaj ngjarjeje foli edhe kryetari i sivjetmë i Kongresit Botëror të Poetëve, shkrimtari dhe akademiku nga Kosova, Jeton Kelmendi. Ai e cilësoi organizimin e këtij kongresi në Kosovë si një ngjarje historike dhe me rëndësi të veçantë për afirmimin ndërkombëtar të kulturës dhe letërsisë kosovare.
Komuna e Pejës ndau mirënjohje për disa personalitete të njohura botërore: Dr. Yu Hsi nga Tajvani, president i Akademisë Botërore të Arteve dhe Kulturës; Dr. Bei Ta nga Kina; Dr. Maria Miraglia nga Italia dhe Dr. Achyuta Samanta nga India.
Pas përfundimit të ceremonisë, pjesëmarrësit vazhduan vizitën në Rugovë dhe Radac, ku u njohën nga afër me peizazhet dhe bukuritë e jashtëzakonshme natyrore të këtyre trevave. Vizita në Pejë, Rugovë dhe Radac ndërthuri poezinë, kulturën, mikpritjen dhe promovimin e trashëgimisë natyrore të Kosovës para personaliteteve nga e gjithë bota.
