Në Pejë ka nisur Festivali i Letërsisë “Peja”, një ngjarje kulturore, që synon të promovojë letërsinë, krijimtarinë letrare dhe autorët vendorë, duke krijuar hapësira për takime dhe bashkëbisedime mes shkrimtarëve, poetëve dhe dashamirësve të kulturës.
Festivalin e hapi Drejtoresha për Kulturë, Rini dhe Sport e Komunës së Pejës, znj.Xhenet Syka, e cila në fjalën e saj përshëndetëse theksoi rëndësinë e organizimit të aktiviteteve të tilla për zhvillimin dhe pasurimin e jetës kulturore të qytetit, si dhe për promovimin e krijimtarisë dhe autorëve vendorë.
Nata e parë e festivalit u karakterizua nga një program i pasur letrar, me deklamime poetike nga poetë vendorë, të cilët sollën para publikut vargun, emocionin dhe krijimtarinë e tyre.
Në kuadër të kësaj mbrëmjeje u zhvillua edhe promovimi i librit të autores znj.Naxhije Berbati Kastrati, i shoqëruar me një bashkëbisedim mbi veprën dhe krijimtarinë e saj letrare.
Në programin e natës së parë kontribuuan: Indira Hoxha, Nagjije Kastrati, Olta Lajqi, Leona Asllani, Njomza Kelmendi, Agim Desku, Prend Buzhala, Idriz Berisha, Mikel Gojani, Elena Mujaj, Ismet Krasniqi dhe Fazli Ferati.
Festivali Ndërkombëtar i Letërsisë “Peja”, i organizuar nga Drejtoria për Kulturë, Rini dhe Sport e Komunës së Pejës, synon të fuqizojë rolin e letërsisë në jetën kulturore, të promovojë autorët vendorë dhe të nxisë kulturën e leximit.
Aktivitetet e festivalit do të vazhdojnë deri më 10 tetor, me një program të pasur me poezi, promovime librash, bashkëbisedime dhe aktivitete të tjera letrare e kulturore
